Притчи

1

Давутну уланы, Исрайылны пачасы Сулейманны айтывлары

2

инсанлар гьакъылны да, насигьатны да англасын деп, тюз айтылгъан сёзлени маънасына тюшюнсюн деп,

3

тюз ойлашывну, гьалаллыкъны, адилликни, гертиликни къайдаларын билсин деп,

4

англавсузлар сынав топласын деп, жагьиллени де билими, оьтгюрлюгю болсун деп язылгъан.

5

Гьакъыллылар, эшитип, билимлерин артдырар, англавлу адамлар да, эшитип, ёл гёрсетив табар,

6

тапшурмаланы, айтывланы, гьакъыллыланы айтгъанларын да, сырларын да англар.

7

Раббибизден къоркъмакъ – будур гьикматлыкъны башы! Агьмакълар гьакъылны да, насигьатны да гёрюп ярамас.

8

Балам, атангны насигьатына тынгла, анангны да тапшурувун гери урма;

9

шолар башынга тизив таж йимик, бойнунга да минчакълар йимик болур.

10

Балам, эгер де гюнагьлылар сени оьзлеге багъып тартса, вёре, олагъа ий болуп къалма.

11

Олар булай сёйлер: «Бизин булан юрю, оьлтюрмек учун, айыпсызланы алдын къыркъайыкъ, оланы яшыртгъын къаравуллап токътап турайыкъ;

12

къабур оьлюлени ютагъанда йимик, ахырат оьлтюрмейли ютагъанда йимик, оланы савлайын ютуп къояйыкъ.

13

Гьар тюрлю байлыкълагъа ес болайыкъ, уьйлерибизни талагъан малдан толтурайыкъ.

14

Даим бизин булан бирче чёп ташларсан, бизге тюшген пай сагъа да тюшер!»

15

Балам, олар булан бир ёл булан юрюме, оланы сокъмагъына тюшмекликден де сакъ бол,

16

неге тюгюл де олар яманлыкъгъа багъып чабар, къан тёгювге багъып алгъасар.

17

Бир ерден башгъа ерге учуп айланагъан къушлагъа, олар гёре де туруп, тор ташламакъдан зат чыкъмас.

18

Гюнагьлылар, яшыртгъын къаравуллай туруп, оьзлер оьзлени торуна тюшюп къалар.

19

Гишини байлыгъына сутурланагъан гьар-бир адамны ахыры шулай болур: шо байлыкъ ону оьзюн дагъытар.

20

Гьакъыл орамда къычырып айланар, майданларда авазын гючлендирер;

21

кёп халкъ жыйылгъан ерде чакъырыв этер, шагьарны къапу алдында булай сёйлер:

22

«Къачан болгъунча гьайгевлер гьайгевлюгюнден къуванып турар, уятсызлар уятсызлыгъы булан йыбанып турар, агьмакълар билимни гёрюп ярамайгъан кююнде турар?

23

Мени айтагъанларыма бир токътап тынглагъыз, сизге багъып ругьумну тёгермен, сизге билимлеримден берермен.

24

Мен сизин нечакъы чакъырсам да, бир якъгъа бурулуп къалдыгъыз, къолумну узатсам да, биригиз де эслеме сюймедигиз.

25

Сиз бары да таклифлеримни гери урдугъуз, айтагъанларыма да гьеч къулакъ асмадыгъыз.

26

Къайырмас, мен де сизин къайгъыгъызны уьстюнден кюлермен, азап къопгъанда мысгъылларман.

27

Сизге азап боран йимик гелип къалар, балагь да алатолпан йимик, хапарсыздан гелип къалар; зулму да, юк де сизин басып янчар.

28

Шо заман мени чакъырса да, жавап бермен, излеп айланса да, мени тапмас.

29

Билимни гёрюп ярамагъаны саялы, Раббибизден къоркъмагъаны саялы,

30

мени таклифимни къабул этмегени саялы, бары да айтагъан затларымны гёрюп ярамагъаны саялы,

31

олар оьзлени ишлерини натижаларын гёрер, намарт хыялларындан тазза къанып къалар.

32

Неге тюгюл де, хырчалыкъ агьмакъланы оьлтюрер, гьайсызлыкъ да гьайгевлени дагъытар.

33

Магъа тынглайгъан адам буса, бир балагьдан да къоркъмай, парахат яшап къалар».

© 2018 Дом Молитвы. Христианская Интернет Миссия.