1

Иаковимӕ Мысырмӕ йӕ бинонтимӕ чи ӕрцыди, мӕнӕ Израилы уыцы фыртты нӕмттӕ:

2

Рувим, Симеон, Левий, Иуда,

3

Иссахар, Завулон, Вениамин,

4

Дан, Неффалим, Гад ӕмӕ Асир.

5

Иаковы байзӕддӕгтӕ, йӕ тугйе стӕг, ӕдӕппӕт уыдысты дӕс ӕмӕ ӕртиссӕдз адӕймаджы; Иосиф та Мысырмӕ раздӕр ӕрбафтыди.

6

Амард Иосиф, амардысты йеппӕт ӕфсымӕртӕ дӕр, ӕмӕ сӕ уыцы фӕлтӕрӕй ничиуал баззад.

7

Фӕлӕ Израилы байзӕддӕгтӕ цот уагътой дзӕвгар, сбирӕ ӕмӕ стыхджын сты тынг, ӕмӕ анхъӕвзтой ӕппӕт бӕстӕйыл.

8

Уӕд Мысыры сӕргъы ӕрлӕууыди ног паддзах; уый Иосифы тыххӕй ницы зыдта.

9

Паддзах загъта йӕ адӕмӕн: «Акӕсутма израилаг адӕммӕ, сты бирӕ ӕмӕ махӕй тыхджындӕр.

10

Мах зондджындӕр хъуамӕ разынӕм уыдонӕй, науӕд ӕгӕр сбирӕ уыдзысты, ӕмӕ хӕст куы уа, уӕд не знӕгты фарс фӕуыдзысты, схӕцдзысты немӕ ӕмӕ ацӕудзысты нӕ бӕстӕйӕ».

11

Ӕмӕ израилӕгтӕн сӕргъы сӕвӕрдтой хицӕуттӕ; уыдон сӕ ӕфтыдтой тӕккӕ уӕззаудӕр куыстытыл, хъизӕмарӕй сӕ мардтой. Ӕмӕ хор ӕфснайынӕн израилӕгтӕ фараонӕн сарӕзтой Пифомы ӕмӕ Раамсесы сахартӕ.

12

Фӕлӕ сӕ цас тынгдӕр ӕфхӕрдтой, уыйас фылдӕр ӕфтыд сӕ нымӕцыл, уыйас парахатдӕр хӕлиу кодтой зӕххыл, ӕмӕ израилаг адӕм мысырӕгтӕн фестадысты уӕнгӕл.

13

Ӕмӕ мысырӕгтӕ ӕгъатырӕй ӕфхӕрдтой израилаг адӕмы – ӕфтыдтой сӕ уӕззаудӕр куыстытыл.

14

Сӕ цард сын ад нал кодта тыхкуыстӕй – ӕлыгӕй самандур аразынӕй, быдыры кусынӕй; ӕгъатырӕй сӕ ӕфтыдтой ӕппӕт уыцы куыстытыл.

15

Дзуттаг сылгоймӕгтӕм арыны рӕстӕг сӕ цӕст дардтой ӕвгъӕдгӕс устытӕ Шифрӕ ӕмӕ Фуа. Мысыры паддзах сын бафӕдзӕхста:

16

«Дзуттаг сылгоймӕгтӕм арыны рӕстӕг уӕ цӕст дарут: лӕппу куы райгуыра, уӕд ӕй амарут; чызг куы уа, уӕд ӕй ныууадзут удӕгасӕй».

17

Фӕлӕ ӕвгъӕдгӕс устытӕ тарстысты Хуыцауӕй, ӕмӕ мысыраг паддзахы ныхасмӕ нӕ хъуыстой; сывӕллӕттыиу ныууагътой удӕгасӕй.

18

Уӕд паддзах басидт ӕвгъӕдгӕс устытӕм ӕмӕ сӕ бафарста: «Уый цы хабар у? Сывӕллӕтты удӕгасӕй цӕмӕн ныууадзут?»

19

Устытӕ дзуапп радтой фараонӕн: «Дзуттаг сылгоймӕгты мысыраг сылгоймӕгтимӕ ма бар; уыдон фидар сты, ӕмӕ сӕм цалынмӕ ӕвгъӕдгӕс бахӕццӕ вӕййы, уӕдмӕ ныййарынц».

20

Уый тыххӕй ӕвгъӕдгӕс устытыл Хуыцау ӕфтыдта Йӕ хорзӕх, ӕмӕ израилаг адӕм кодтой фылдӕрӕйфылдӕр ӕмӕ тыхджынӕйтыхджындӕр.

21

Ӕвгъӕдгӕс устытӕ Хуыцауӕй кӕй тарстысты, уый тыххӕй сын Хуыцау Йӕ арфӕ ӕфтыдта сӕ хӕдзӕрттыл.

22

Уӕд фараон йеппӕт адӕмӕн радта бардзырд: «Дзуттӕгты алы ноггуырд лӕппуйы дӕр ӕппарут Нилы цӕугӕдонмӕ, чызджыты та уадзут удӕгасӕй».

© 2018 Дом Молитвы. Христианская Интернет Миссия.